تحدث الرئيس عبد الفتاح السيسي عن أزمة الغلاء واحتياجات الدولة الدولارية خلال الاحتفال بعيد الشرطة اليوم قائلا: «النهادرة محطات الكهرباء بتاخد غاز يسوى تقريبا مليار دولار شهريا، 3 مليارات دولار مش أقدر مش أوفرهم لأنها حاجات أساسية، أنا مش داخل فى نقاش، بحاول أشرح لكم حجم التحدى اللى عايشنه حتى من قبل 2011، الأرقام دى إذا مكنتش الدولة المصرية يعملوا على زيادة موارد الدولار وتكون أكثر أو تساوى انفاقنا،إللى بيجلنا من بيع منتجات أو التصدير أو قناة السويس أو السياحة، لو مش حققنا المعادلة دى هتكون المشكلة دى.. هى دى الحكاية كلها اللى عاملة»
وأكد الرئيس السيسي، أن «الأزمة اللى احنا فيها دي لها حلول، بس صدقونى حلولها تعتمد علينا احنا كنا بنستورد بـ 4.5 مليار دولار سيارات انت بتروح للبنوك والبنكك المركزي عاوز افتح علشان اجيب ده وده، الدولة المصرية حاليا 106 مليون بالمناسبة ومطلوب توفرها كل شىء، أولا أسجل احترامى للمصريين انا بحلف بالله، بحلف بالله، تقديري لهم، وبقول للمواطن الغلبان والبسيط بسجل احترامي وتقديري للجميع»
وأوضح الرئيس السيسي قائلا، «انا عارف ان الحياة والظروف صعبة والأسعار غالية، بس عايز أقولكم يمكن الله أراد أن نرى مشاهد قاسية جدا فى غزة، وكان هناك أكثر من 25 ألف شهيد من المدنيين، ثلثيهم من النساء والأطفال فى القطاع وتدمير كامل للقطاع كله، وأنا بستدعي بالكلام دا أد ايه بنواجه ظروف على حدودنا الغربية والشرقية والجنوبية، واواعوا تفتكروا أن الأمور دي بتعدي وميكونش لها تأثير علينا».
وأضاف الرئيس السيسي، «اتقالنا من اقتصاديين كتير جدا إن مصر تحتاج لعمل انكماش شديد جدًا في الاقتصاد بتاعنا ووقف كل المشروعات اللي بتتعمل وهي وجهة نظر من الناحية الاقتصادية جيدة، بس انا هحط قدامها اني بشغل 5 أو 6 ملايين اخليهم يقفلوا ويروحوا»، مضيفا أن «الدنيا غالية بس كلنا نقدر نعيش، لو نستحمل هنعيش وهنكبر وهنتجاوز المشكلة دي».
وتابع الرئيس السيسي، قائلا: «انا مقدر الظروف الصعبة اللي البلد بتمر بيها ومقدر أكثر صلابة المصريين، انا عارف أن الحياة صعبة والظروف صعبة والأسعار غالية ».
وقال الرئيس عبد الفتاح السيسي، إن «تضحيات الشهداء نقدرها ونتحمل جميعا مسئولية كبري فى أن نقابل كرم الشهداء بكرم وتضحياتهم بتضحية وأن نحقق حلمهم لمصر عزيزة وكريمة إلى واقع وحقيقة لأبنائنا وأحفادنا جيلا بعد جيل».
وأضاف أن «أن هذا اليوم الجليل، وقف فيه الأبطال يدافعون عن مصر، في الإسماعيلية عام 1952، وأن هؤلاء الأبطال قدموا طاقة وأن تضحيات أبناء الشرطة في الإسماعيلية كانت محركة لتضحيات الأبطال في الفترة الأخيرة لمواجهة الإرهاب», مشيرا إلى أن جميع التضحيات نقدرها ونقدر ما قدموه لمصر، فتضحيات الأبطال كبيرة.
واستكمل الرئيس السيسي، «إن ذكري اليوم تأتي فى وقت محورى تواجه فيه منطقتنا تحديا غير مسبوقا ومصر تواجه واقعا إقليميا خطيرا، فقد كان موقفنا فى التطورات الأخيرة التي شهدتها المنطقة فى غزة واضحا منذ البداية وقائما على الشعور العميق بالإنسانية لمصر بالوقوف دائما بجانب الشعب الفلسطيني».
وأشار الرئيس السيسي: إلى«إن تعقيد الظروف الدولية والإقليمية فرض علينا تحديات إقتصادية كبيرة لم نكن لنصمد أمامها إلا بما حققته إرادة شعب مصر العظيم التي شيدت أساس متينا يعيننا بإذن الله على عبور التحديات».
