كشفت الفنانة ياسمين صبري عن العديد من الأسرار والتفاصيل في حياتها، عندما حلت ضيفة على برنامج «بيج تايم بودكاست» الذي يقدمه الإعلامي عمرو أديب بقناة «إم بي سي».
ونرصد أبرز التصريحات والأسرار والتفاصيل التي أدلت بها الفنانة ياسمين صبري خلال حوارها برنامج «بيج تايم بودكاست».
ياسمين صبري من أسرة متوسطة
أوضحت ياسمين صبري قائلة "أنا من أسرة متوسطة وجدتي ست ربتني وبداية حياتي كنت في مدارس حكومية بعد كده اتطورت لإن مامتي مستواها اتحسن فكنت بانتقل من مدرسة لمدرسة فعشت مع كل الطبقات، وكنت بنت زي أي بنت مصرية ولا عندي واسطة ولا أي حاجة، وتخرجت من الجامعة أمي قالت لي أنتِ هتصرفي على نفسك وتشتغلي واشتغلت أول وظيفة حقيقية كانت في مكتبة الإسكندرية علاقات عامة، وحاولت أتثبت في المكتبة قالوا لي لأ مفيش مكان فاضطريت أسيب المكتبة لإني عايزة دخل ويبقى عندي عربية كحماية وكنت بنت لازم آخد بالي من نفسي في الشارع بدل من ركوب التاكسي وبعد كده اشتغلت وظيفة تانية في الاتصالات وكان عندي مرتب قدرت منه أجيب عربية بالقسط من خلال البنك وكنت مرزقة".
ياسمين صبري والبكاء
قالت ياسمين صبري «بعيط من كرم ربنا عليا، وبكيت امبارح، فـ الإنسان لما ربنا بيحبه بتكون حاجة سلسة»، لافته أن«كل فترة بطور وبتشكل وبتغير دائمًا فكري بضبطه على أوضاعي الجديدة، وحزنت على جدتي لما توفت، فلما قالوا لي روحي المقابر نزورها أقول لهم لا، أروح المقابر ليه؟ هي في منطقة أفضل وأحسن».
وأوضحت: «بحس إني بكلم جدتي في أي وقت، وهي في مكان أفضل، لكن أنا لا أذهب للمقابر لأن دينا دين تسامح وبحاول أكون إيجابية مش سلبية»، متابعة أنها «بكيت فترات قليلة جدًا في حياتي، وأنا أدمع لما تحصلي حاجة حلوة في حياتي».
ياسمين صبري والفلوس
قالت ياسمين صبري إن"الفلوس حلوة وجميلة لما تيجي بسلاسة من غير جري الوحوش من غير ما تبقى هوس وهدف لإن لو بقت هدف وما جتش هيبقى الإنسان محطم وكدا غلط، هي تيجي تمتعني وبأجمل وأنقى الطرق"، مضيفه "أنا تجربتي الشخصية الفلوس جات لي بسهولة شديدة وبأقل مجهود وده نوع من أنواع الرزق، وعملت نفسي بنفسي، وسعيك إنك ما موتش نفسك، ودا مش معناه إن الإنسان ما يبقاش محترف وما يحترمش نفسه، ولكن المجهود يكون بسيط مش مميت ورزقك كبير".
ياسمين صبري والإعلانات
وتابعت: "بعد سنة ونصف من شغلي الاتصالات مشوني ودي كانت أحسن حاجة حصلت لي بالرغم من الصدمة، وحاربت وحاولت بس قالوا لي آسفين وتوكلت على الله وقلت عايزة أبقى مذيعة وأشوف لي حلم جديد وأنا ما عنديش أي واسطة في الميديا وأشوف الممثلين في التليفزيون كإنهم شيء بعيد جدًّا ومفيش أي صلة، جيت أقدم في مسابقة جمال مصر فاتلغت وبعد كدا قالوا لي ادخلي مجال الإعلانات وعملت أول إعلان لشركة سيارات وبنيت حيطان كتير حواليَّ وبعد لما أخلص الإعلان ما أكلمش حد قالوا مغرورة أو انطوائية بس دا كان تحفظ وخطوط ما حدش يتعداها معايا ولا عايزة أعرف حد ولا حد يعرفني، وبعد كده اتطلبت في إعلانات تانية لحد لما بقيت أغلى فتاة إعلانات في مصر خلال شهور لإني كنت أعمل إعلانات معينة بعيدًا عن إعلان الصابون وما شابه".
ياسمين صبري حالة نادرة
قالت الفنانة ياسمين «أنا كياني يضيف لأي رجل أكون زوجة له، كل شيء اشتغلت عليه وبنيته، السمعة والأسلوب والطريقة، وعدم وجود أخطاء، كلها أشياء تضيف له».
وتابعت: "دي حقيقة لإني ست متحفظة في ملابسي وطريقتي وأسلوبي وأفلامي وتمثيلي وظهوري وكل شيء، والرجل الشرقي يعشق حاجة زي دي وهي حاجة نادرة"، موضحة أن تحفظها يظهر من خلال طريقتها في العمل قائلة: "أنا نادرة في قلة ظهوري وبشتغل فقط، مش هتلاقيني في حفلة حتى لو في إطار العمل أو بعد مهرجان أو حاجة تابعة لشغلي عالمية".
واستكملت: "أنا ست أحب جدا زي ما أنا في قمة أنوثتي أحب الرجل يكون في قمة ذكورته، بمعنى الرجال قوامون على النساء، هو يقوم بمسئولياتي، أومال الست تصرف على الراجل؟ من قديم الأزل كانت الست تقعد في الكهف والرجل يصطاد، والأنثى هي الاحتواء أما الرجل فهو المعيل، وإحنا مخلوقين حوا من آدم".
ياسمين صبري والأمومة
وردا على سؤال عن مكانة الأمومة في أولوياتها، قالت ياسمين صبري: "طبعا ده جزء من رسالتي في الدنيا، لازم كل ما تعلمته أطلع بواسطته أطفال متوازنين طبيعيين سليمين نفسيا، ويمكن كل اللي ربنا أداهولي تجهيز، مش يمكن أجيب ولد يطلع رئيس جمهورية".
ياسمين صبري والزهد
قالت الفنانة ياسمين صبري: "ذكر عن الرسول صلى الله عليه وسلم، أنه قال خدوا الجنتين جنة الأرض وجنة الآخرة، ومين قال إن الإنسان القريب من ربنا والطاهر والكويس اللي ما بيأذيش حد يعيش زاهد في الحياة ويقول كله هاخده في الجنة، لأ دي هي جنتين".
