كشفت الفنانة مي عمر والتي تجسد دور «نعمة الأفوكاتو» في مسلسلها الرمضاني 2024، عن رأي الزعيم عادل إمام في تمثيلها، وعن شغلها مع زوجها المخرج محمد سامي بالإضافة إلى العديد من الأسرار والتفاصيل والتصريحات الخاصة في حياتها.

حيث حلت الفنانة مي عمر ضيفة ببرنامج «أسرار» المذاع عبر فضائية «النهار»، مع الإعلامية أميرة بدر، كاشفة عن الكثير من الأسرار والتفاصيل والتصريحات الخاصة بحياتها والتي نستعرضها في التقرير التالي.

مي عمر ورأي الزعيم عادل إمام فيها

كشفت الفنانة مي عمر عن كواليس عملها مع الزعيم عادل إمام قائلة: «رفضت بطولة بعد مسلسل الأسطورة، وكنت عايزة أشتغل مع نجوم كبيرة قبل ما أعمل بطولة، واتعرضت عليا رواية اسمها رغم الفراق وما نزلتش».

وأوضحت الفنانة مي عمر، قائلة «خُفت من الشغل مع الأستاذ عادل إمام، ومن أول شغلي؛ كان حلمي أشتغل معاه، وقبل التصوير بيوم ما نمتش، وقعدت أحفظ كتير عشان ما أنساش».

واستكملت الفنانة مي عمر، قائلة «ولما رحت التصوير فجأة لقيت الأستاذ عادل بيطمني وبيقولي مبروك أول يوم وما تقلقيش، واتعلمت منه الالتزام والثقافة وإنه بيتابع وبيتفرج على كل الأعمال، وموصلش للي هو فيه بسهولة، كنت بقعد معاه أهريه أسئلة، وكلمني تاني يوم عرض المسلسل، وقالي مبروك، أنا اتفرجت عليكي، وهتبقي ممثلة مهمة، واتكلم عني في الصحافة بكلام حلو أوي، وقال لي إحساسي عالي».

مي عمر وهجوم إحدى الفنانات

كشفت الفنانة مي عمر عن مهاجمة أعمالها من قبل احدى الفنانات ،قائلة: «جعفر العمدة نجح أكتر من لؤلؤ وعمل نجاح وحالة مشفنهاش بقالنا كتير، ومعنديش الشجاعة اقول مين الفنانة اللي بتهاجمني، واعتقد الواحد يركز على نفسه أفضل ويطور من نفسه، وكل عمل يبقى احلى من اللي قبله», مشيرة إلى إلى أنها «عرفت الشخصية اللي بتهاجمني من كذا حد، والحاجات دي بتبقى معروفة، وناس من اللي بيقبضوا فلوس قالولي كده، وبحاول اركز في نفسي وهي بتضايقني لان بلاقي كلام غريب وهجوم مش مفهوم، وزمان كنت بتضايق اوي لكن بطلت لان ربنا بيعوضني ومديني حاجات كتير حلوة، وهي ربنا يكرمها وكل واحد يركز في شغله ودي طريقة مش حلوة اننا نعلي نفسنا، وبحس ان ده شر بيّن ولو عملت كده ربنا عمره ما هيكرمني، ودي اسهل حاجة ممكن نعملها».

وتابعت الفنانة مي عمر قائلة: "في الاخر اللي بيرد هو النجاح، ومهما حصل هجوم ومهما اتأجر ناس للهجوم فا بيبقى أصغر من النجاح، وبحب اشوف رد الشارع اكتر، مبسدش ودني عن النقد، ومش كل حاجة اقول دي لجنة، انا مش كده خالص، بالعكس بقول يمكن ده حقيقي وفيه نقاد بحب اسمع رأيهم، وبحب النقد الحقيقي يمكن فيه كومنت مفيد ليا، وبحب استاذ طارق الشناوي، ولما بيقول عليا حاجة كويسة او حاجة وحشة، بحب اسمعه، ومرة قال حاجة قلت اه عنده حق لازم اخد بالي، بس فيه ساعات نقد مبالغ فيه، مش نقد على قد ما هو فيه شخصنة، لازم نبقى في انتقادنا منطقيين وندي الناس حقها، ولو فيه حاجة مش عجبانا نقول لكن مش بدون مبررات".

مي عمر والغيرة

كشفت الفنانة مي عمر عن طريقة غيرتها على زوجها المخرج محمد سامي، قائلة: «انا بغير بس مبحبش أبيّن، بغير من حاجات هبلة، وبقول انا اتضايقت لو حصل حاجة معينة، وهو محترم وبيراعي الحتة دي».

وقالت مي عمر: «لو حصل من محمد سامي حاجة، هيبقى رد فعلي كبير، لأن الخيانة مش حاجة سهلة ومش هقدر اتقبلها، وانا مش همشي ورا الاشاعات، ولو وصل الأمر للخيانة مستحيل اعمل نفسي مش واخدة بالي، ومقدرش ابقى مع واحد بيخوني، ومش حاسة اني هقدر استحمل الخيانة، ومش بغير من حبه لبناته».

مي عمر ومسلسل جعفر العمدة

قالت الفنانة مي عمر: «أنا ما غيرتش من نجاح مسلسل جعفر العمدة، وهو مسلسل كسر الدنيا وبنبسط أكتر إن محمد يبقى نجاحه أكتر مني لأن نجاحه هو نجاحي»، وتابعت قائلة «بحب محمد سامي أوى وكنت أسعد واحدة في الدنيا أما جعفر العمدة نجح وأنا ومحمد أصحاب جدا حتى قبل ما نتخطب، وبحس إن دي أهم حاجة».

ولفتت الفنانة مي عمر، قائلة «أما بيكون عندي مشكلة؛ هو أول واحد برفع سماعة التليفون وأكلمه، أو خبر حلو بشاركه كل حاجة، واحنا هوايتنا تقريبا واحدة، وبنستمع لبعض، ومحمد جدع جدا».

وردت الفنانة مي عمر، على سؤال صياح محمد سامي بها فى موقع التصوير، معقبة: «هو مش بيزعق ولكن ممكن ينفعل قدام الناس عادي وهذا وارد، وأى مخرج ممكن ينفعل ومش بيبقي إنفعال بطريقة وحشة».

مي عمر ومسلسل «نعمة الأفوكاتو»

أكدت الفنانة مي عمر، قائلة «محمد سامي مأقنعنيش أني أظهر في نعمة الأفوكاتو من غير ميك أب لأني أحب التمثيل وأحب أعيش الشخصية ولو دا شكلها هعمله»، مضيفة قائلة «وانا شخصيتي حاجة والدور اللي بعمله حاجة تانية لأني بستمتع بشغلي».

وأوضحت الفنانة مي عمر، قائلة «أنا ما حرمتش أني أشتغل مع محمد سامي تاني فى نعمة الأفوكاتو، لأن محمد سامي مخرج أى حد يتمني إنه يشتغل معاه، وأنا ومحمد قصة قديمة أوى من زمان، وأما بشوفه وهو بيخرج والمجهود اللي بيعمله؛ كنت دائما أقول يا بخته ويا حظه اللي يشتغل معاه».

وأضافت مي عمر، قائلة «أكيد أما بتجيليش فرصة زي دي دا حظي.. وشخصية نعمة من أكتر الشخصيات اللي حبيتها، وهي مختلفة جدا فى طريقة كلامها وهزارها وجرأتها وردودها وتفكيرها».

وأستكملت الفنانة مي عمر، قائلة «حتي شكلها بحبه ولبسها كمان، وفيه ستات كتير بتضحي عشان الراجل اللي بتحبه زيها، وما قدرش أقول أن الست غلط، ولكن على رد فعل الراجل وأنه استغل الموضوع غلط وفيه رجالة كويس».

جدير بالذكر أن الفنان مي عمر تقوم بدور البطولة في مسلسل «نعمة الأفوكاتو» والذي يعرض في ضمن الأعمال الدامية رمضان 2024، ويشارك في المسلسل النجم أحمد زاهر, وطارق النهري وأروا ونخبة كبيرة من الممثلين والمسلسل منإخراج محمد سامي