كشفت المخرجة إيناس الدغيدي، عن العديد من الأسرار والتفاصيل في حياتها، عندما حلت ضيفة على برنامج «أسرار» مع الإعلامية أميرة بدر المذاع على قناة «النهار»، ومنها بدايتها في الإخراج، وحكاية زواجها من شخص مثلي، وعلاقتها بربنا، وحكاية قراءة الفنجان، وعلاقات الحب في حياتها، ورأيها في ياسمين صبري.
ونرصد أبرز التصريحات والأسرار والتفاصيل التي أدلت بها المخرجة إيناس الدغيدي، خلال حوارها لبرنامج «أسرار».
إيناس الدغيدي وبدايتها في الإخراج
قالت المخرجة إيناس الدغيدي أنها "اشتغلت 45 فيلم مساعدة مخرج مع أكبر المخرجين، وكنت معروفة وكانت الصحافة بتكتب عني، أنا مرة مفيد فوزي كتب عني وأنا مساعدة مخرج، وقال: "أنا دخلت مع حسن الإمام وشوفت شابة جميلة، فاعتقدت إنها من الممثلات وفوجئت بأنها مساعدة مخرج".
وتابعت: "لما بطلع في أي برنامج دايما أفكاري مش عاجبة الناس، ومبعرفش أقول اللي مش جوايا، مش هكذب ومش هنافق، ودايما أقول إن الجمال باب بيساعدك تاخدي مميزات أكتر من غيرك، بس الست الذكية هي اللي متعتمدش على جمالها بس، والحتة دي خليتني جادة جدًا".
إيناس الدغيدي علاقتي مع ربنا كويسة
علقت المخرجة إيناس الدغيدي على علاقتها مع ربنا وتصريحاتها الدينية المثيرة للجدل قائلة: «عندي أفكار معينة عن ربنا، قلت قبل كده العلاقة بيني وبين ربنا اللي بتاخدها الناس باستهزاء، الناس واخدة جرأتي اني متكلمش عن ربنا عشان الحتة الدينية، وعلاقتي قوية جدًا بربنا، وكل يوم بشكر ربنا رغم اني مش متدينة وعندي جملة خدتها من علم الطاقة، انا بدرس طاقة اونلاين والجملة هي، اللهم اني احبك فاحببني فيك أكثر ياالله، الجملة دي ممكن اعيط فيها، بقولها طول مانا سايقة لوحدي لاني بحب اسوق، بحس إني في علاقة بيني وبين ربنا، عشان كل اللي بيتقال عليا».
إيناس الدغيدي حجيت مرتين وبتاع 30 عمرة
وأوضحت المخرجة إيناس الدغيدي، «مبسمعش شيوخ، ولو سمعت مبديلوش أي اهتمام، ووالدي طول حياتنا كان بيكلمنا في الدين، وكان رجل متفتح ومن طفولتي بتعلم دين، حجيت مرتين وبتاع 30 عمرة، اول مرة رحت حسيت بحاجة غريبة لكن بعد كده بتبقى طقوس اكتر من إحساس، ومدعيتش عشان كنت بعيط، وطلبت الشهره والفلوس والمجد، وعمري ماندمت على اي حاجة صرحت بيها ومش ندمانة على أي فعل، بما فيهم الأفعال اللي مش كويسة في نظر الناس، الخطأ والصواب بنتعلمه، ومش ندمانة على تصريح الحجاب، ووالدتي ماتت 80 سنه ومش محجبة ومش معناه إنها مش كويسة، والدين متدين جدًا وكنا نلبس ميني جيب، وأنا في الحج رحت بشعري وأول مانزلت هناك اتحجبت ومكنتش طايقة، مبهتمش أشوف فرض ولا لاء المهم أنا عايزة ولا لاء، وعملت الخط بتاع الحجاب ده في فيلم امرأة واحدة لا تكفي».
إيناس الدغيدي رفضت الزواج من مثلي جنسيا
كشفت المخرجة إيناس الدغيدي عن رفض زواجها من مثلي جنسيًا قائلة: «عرض زواجي من صديقي المثلي جنسيًا رفضته، هو كان صديق بره عايش في ايطاليا، وكان سنه كبير، وعارف اني عارفة، وكان عايزنى عشان ابقى رفيقة، لان سننا مش بتاع شهوة، وضحكت لما عرض عليا، ويمكن يطبطب عليا وجنبه حد تاني من جنسه، ومكانش يعرف رد فعلي وحولت الموضوع هزار، كان رجل عربي، وصديقي ورجل محترم وبيعمل خير».
إيناس الدغيدي بحب اشوف الفنجان
قالت المخرجة إيناس الدغيدي، «عمري ماحسدت حد، وبحب اشوف الفنجان، وكل شهور واحدة بتجيلي تقرالي الفنجان، لاني مقتنعة اني اللي بشوفه بحققه، واخر مرة من اسبوع واحدة قالتلي هيجيلك موبيل هجدية، قلت ايه الهبل ده، بعدها جالي تليفون هدية فعلًا، استغربت جدًا، وفيه حاجات كتيرة بتتحقق، ورأيي في ليلى عبد اللطيف هي صديقتي لكن شافتلي مرة ومتحققش، عندي شراهه للسفر، لما برجع من رحلة بفكر في اللي بعدها، وانا حاليا في آخر حياتي عايزة الف العالم، يارب ابعتلى مليون دولار عشان الف العالم، ونفسي اشتغل مع الهام شاهين مسرح لانها خريجة مسرح ولغتها كويسة».
إيناس الدغيدي وعلاقات الحب في حياتها
علقت المخرجة إيناس الدغيدي على علاقات الحب في حياتها قائلة: "مش هحب بدون ارادة، لكن لو مخططة ده مش حب، ده احتياج لأي حاجة، الحب مفيهوش ممنوع، الله اعلم بجوزك، يمكن فيه واحدة بتحب جوزك وانتى متعرفيش، والستات اللي بتراقب كتير هي اللي بيطلع عينها، وعشان تعبتيني هقومك شاكه من هنا".
وقالت المخرجة إيناس الدغيدي، «الرجالة غيرنا احنا حبيبة وهما لأ، معنديش أسرار في حياتي، لاني بقول على طول، مش عارفة ممكن اوجع واحدة تانية ولا لاء، بس عمري ماخرب بيت واحدة، وممكن احب جوزك لكن اخرب بيتك لاء، وانا في جروب متجوز ولما اتطلقت قلت هياخدوا مني موقف، وانا في مجتمع كل رجالته عليهم العين، وقالولي انتي بالذات عمرنا ما هنشك فيكي، لانك معانا من صغرك، ومش هيحصل انهم يخافوا مني».
إيناس الدغيدي ورأيها في ياسمين صبري
تحدثت المخرجة إيناس الدغيدي، عن أداء ياسمين صبري: قائلة «ياسمين صبري دخلت التمثيل علشان جميلة، ممثلة عايزة تتطور، ومحتاجة مخرجين يساعدوها».
