تحدث الرئيس عبد الفتاح السيسي، عن مبادرة “حياة كريمة”، قائلآ: “هو أنا النهارده فى الريف.. مش بظبط الكهرباء والمياه والطرق وعناصر أخري في حياة كريمة.. التكلفة داخله فى 800 – 900 مليار جنيه.. وقد تصل إلى تريليون جنيه”.
وأضاف الرئيس السيسي، خلال كلمته في افتتاح مشروع مستقبل مصر للإنتاج الزراعى: “بنتكلم عن التطوير والإنفاق على 10 ملايين فدان.. يتم الإنفاق علشان تظبط جودة حياة الناس للريف فيما يخص كل الأعمار والسنين اللى فاتت.. تكلفة حياة كريمة قد تصل إلى ألف مليون جنيه.. ألف مليون جنيه في 3 – 4 سنين.. ازرع واعمل هنا كل شيء الكهرباء والطريق وتسوية الأرض والترع اللى اتعمل فى 400 -500 سنة”.
وتابع الرئيس: “زراعة الأراضي دى فى الدلتا القديمة تم على سنين طويلة جدا.. انت جاي عاوز تعمله في 4-5 سنين.. دي حكاية كبيرة أوي اللى بتتعمل يا مصريين.. من فضلك مش تحط رجل على رجل.. وتتكلم في موضوعات.. الموضوعات دي كلها دراسات واتجمعت في سياق فكري وعلمي وتخطيطي علشان يتم طرحها.. مش تاخد حتة وتسيب الباقي”.
كما تحدث الرئيس عبد الفتاح السيسي، عن تطوير قطاع الكهرباء على مدار السنوات الماضية وكيف ساهمت في تطوير العديد من المشروعات مثل مشروع مستقبل مصر.
قال: “قطاع الكهرباء كان يحتاج إلى التطوير، المستشفيات مش فيها كهرباء، البيوت اللى الكهرباء بتقطع فيها مرة واتنين وتلاتة تعمل إيه، مش رفاهية، دي عناصر مهمة، بناء مشروع مستقبل مصر زي ده أو مشروع توشكي، تقولى أولويات الكهرباء لمرحلة متأخرة مثلا”، مضيفا: “طريق الضبعة، بيترفع الكفاءة ويتوسع، علشان الحجم هنا، حد يقولى كان ممكن يقول بلاش ده!”.
